کراچی سے لاپتہ نمرہ ڈی جی خان سے مل گئی ،دعا زہرہ کی بازیابی تاحال معمہ
لاہور (جے ٹی این پی کے) نمرہ مل گئی دعا بازیابی معمہ
شہر قائد سے لاپتہ ہونے والی ایک لڑکی نمرہ کاظمی کا سراغ مل گیاجبکہ دوسری
لڑکی دعا زہرہ کی بازیابی ایک معمہ بن گئی،اطلاعات کے مطابق دونوں لڑکیاں
پنجاب میں موجود ہیں، ایک کا نکاح لاہور جبکہ دوسری کا ڈی جی خان میں پڑھایا
گیا، دونوں لڑکیوں کے اہل خانہ نے بیٹیاں نابالغ ہونے کا دعویٰ بھی کردیا۔
دعا زہرہ کو دس روز بعد لاہور سے ٹریس کرلیا گیا
تفصیلات کے مطابق کراچی سے لاپتہ دعا زہرہ کو دس روز بعد لاہور سے
ٹریس کرلیا گیا ہے اور اس حوالے سے کراچی پولیس کو بھی آگاہ کر دیا گیا،
جبکہ لڑکی کو جلد والدین کے حوالے کرنے کا امکان ہے۔تفتیشی حکام کے
مطابق دعا زہرہ نے 17 اپریل کو نکاح لاہور میں کیا، نکاح نامے میں اپنی عمر
18 سال لکھوائی ہے، 50 ہزار روپے حق مہر کی رقم لکھوائی گئی ہے، شادی
شیر شاہ لاہور کے ظہیر نامی لڑکے سے کی،
لڑکے کا ایڈریس جعلی نکلا
لاہور پولیس کی ٹیم نکاح نامے پر درج لڑکے کے ایڈریس پر رائے ونڈ روڈ پہنچی
تو وہ جعلی نکلا۔وہ لوگ تین سال قبل ہی گھر بیچ کر اوکاڑہ منتقل ہو چکے ہیں۔ نکاح
نامے پر لڑکے ظہیر احمد کی تاریخ پیدائش 17دسمبر 2001، پتہ سی بلاک شیر شاہ
کالونی رائے ونڈ درج ہے۔ یہ مکان ظہیر کا بھائی شبیر تین سال قبل بیچ چکا ہے۔ اب
یہاں ایک ڈاکٹر کا کلینک ہے۔
نکاح خواں کا ایڈریس بھی جعلی نکلا
دعا زہرا کے نکاح نامے پر اس کی تاریخ پیدائش درج نہیں تاہم عمر 18 سال لکھی
ہے۔ یونین کونسل بابو صابو اور رہائش ملت پارک شیرا کوٹ لاہور درج ہے جبکہ
شادی کی تاریخ 17 اپریل 2022 ہے، حق مہر کی رقم 50 ہزار روپے رکھی گئی ہے۔
نکاح خواں حافظ غلام مصطفیٰ کا ایڈریس مزنگ روڈ لاہور درج ہے جو جعلی ہے۔
نکاح کے گواہان میں ایک ظہیر کا بھائی شبیر احمد اور دوسرا گواہ اصغرعلی حویلی لکھا
دیپالپور اوکاڑہ کا رہائشی ہے۔
کراچی پولیس نے لڑکی کا نکاح نامہ فراہم کیا
لاہور پولیس کے ترجمان کے مطابق کراچی پولیس نے لڑکی کا نکاح نامہ فراہم کیا۔
ابھی تک دعا زہرا کو تلاش کیا جا رہا ہے۔ لڑکی کی بازیابی کے بعد ہی اصل حقائق سامنے
آئیں گے۔دعازہرہ گمشدگی کیس میں لاہور پولیس نے مبینہ نکاح خواں غلام مصطفی کو
حراست میں لے لیا ہے۔غلام مصطفی نے پولیس کو بیان دیا کہ اس نے یہ نکاح نہیں
پڑھوایا،نکاح نامے کی تحریر دیکھی ہوئی لگتی ہے۔تاہم ڈی آئی جی آپریشنز لاہور
ڈاکٹر عابد خان کا دعا زہرہ کے ملنے کے حوالے سے کہنا ہے کہ لاہور پولیس کو
کراچی پولیس نے لڑکی کا نکاح نامہ فراہم کیا،
دعا زہرہ کے ملنے کی خبروں میں صداقت نہیں
پولیس نکاح نامے پر ایڈریس سے لڑکی کو تلاش کر رہی ہے۔ڈاکٹر عابد خان کا کہنا ہے
کہ دعا زہرہ کے پولیس کو ملنے کی خبروں میں صداقت نہیں ہے، دعا زہرہ کی بازیابی
کے بعد ہی اصل حقائق سامنے آئیں گے۔ڈی آئی جی آپریشن کا کہنا ہے کہ لاہور پولیس
کراچی پولیس سے مسلسل رابطے میں ہے، ٹیمیں تشکیل دے دی ہیں، لڑکی کو جلد
تلا ش کر لیں گے۔
نمرہ کا نکاح نامہ منظر پر آگیا
دوسری جانب کراچی کے علاقے سعود آباد سے مبینہ طور پر لاپتہ ہونے اور
ڈی جی خان میں نکاح کرنے والی لڑکی نمرہ کاظمی نے ایڈیشنل سیشن جج کی
عدالت میں درخواست دائر کرتے ہوئے والد پر ہراساں کرنے کا الزام عائد کردیا ہے۔
کراچی سے مبینہ طور پر لاپتہ ہونے والی نمرہ کاظمی کا نکاح نامہ منظر پر آگیا،
نجیب شاہ رخ سے بچپن میں منگنی ہوئی تھی
دوسری جانب نمرہ کاظمی کی جانب سے دی گئی درخواست میں والد پر زبردستی بڑی
عمر کے آدمی سے شادی کروانے کا الزام لگایا گیا ہے۔نمرہ کاظمی نے اپنی درخواست
میں اپنی مرضی سے گھر چھوڑنے اور شادی کرنے کا اعتراف کرتے ہوئے موقف
اپنایا کہ نجیب شاہ رخ سے بچپن میں منگنی ہوئی تھی، پولیس تھانہ تونسہ اور والد
زبردستی طلاق دلوا کر شوہر سے علیحدہ کرنا چاہتے ہیں۔لڑکی کی درخواست پر
ایڈیشنل سیشن جج نے تھانہ تونسہ سٹی پولیس کو غیر قانونی طور پر ہراساں کرنے
سے روک دیا ہے۔
18 اپریل کو میں نے نکاح کیا ، نمرہ
نمرہ کاظمی کا ویڈیو بیان بھی سامنے آگیا ہے جس میں اس کا کہنا تھا کہ میرا نام
نمرہ ندیم ہے، میں شاہ رخ سے شادی کیلئے آئی ہوں، میں 17 اپریل کو ڈیرہ غازی خان
آئی تھی، 18 اپریل کو میں نے نکاح کیا، میں اپنی مرضی سے آئی تھی، مجھے
کسی نے اغواء نہیں کیا ہے۔
دعا زہرہ ابھی نابالغ ، اپیل کرتے ہیں گھر واپس آجائے،والد ین
دعا زہرہ کے والد ین نے میڈیا سے گفتگو کرتے ہوئے کہا ہے کہ بیٹی ابھی نابالغ ہے،
ملنے کی تصدیق نہیں ہوئی، دعا سے اپیل ہے کہ وہ گھر واپس آجائے۔والد نے کہا کہ
میری بچی چار دن بعد 14سال کی ہوگی، اگر میری بیٹی سن رہی ہیں تو اسے کہوں گا
گھر آجائے، ابھی تک تمام فیک نیوز چل رہی ہیں۔انہوں نے مزید کہا کہ سندھ اور پنجاب
پولیس اس حوالے سے آپس میں رابطے میں ہے۔
دعا زہرہ کی والدہ کی ویڈیو سوشل میڈیا پر زیر گردش
دعا زہرہ کی والدہ کی ویڈیو سوشل میڈیا پر زیر گردش ہے جس میں وہ اپنی بیٹی کے
لیے پیغام دے رہی ہیں۔دعا کی والدہ کا کہنا ہے کہ میں کئی دن سے سوئی نہیں ہوں،
کھانا بھی نہیں کھایا جاتا، میری دوسری بچیاں بھی پریشان ہیں اور بہن کی یاد میں
روتی ہیں۔لاپتا دعا کی والدہ نے مزید کہا کہ میں اس سے بہت پیار کرتی ہوں اور
اس کے بغیر زندہ نہیں رہ سکتی، اگر دعا یہ ویڈیو دیکھ رہی ہو تو گھر آجاؤ اور اگر
کوئی لے کر گیا ہے تو خدا کے واسطے ایک ماں کی بددعا مت لو، اسے گھر جانے
دو، ماں باپ سے ملنے دو، ہم اس کے بغیر نہیں جی سکتے۔
نمرہ مل گئی دعا بازیابی معمہ
قارئین ===> ہماری کاوش اچھی لگے تو شیئر، اپ ڈیٹ رہنے کیلئے (== فالو == ) کریں،
یہ بھی پڑھیں : آئی ایم ایف سے جان خلاصی ، حکومت کا عوام سے رجوع کا فیصلہ
